Gaadi Girdhari Van se nikal kar highway par daud rahi thi. Peeche ki seat par Rudra baitha tha, apni god mein chhote se navjaat bete ko sambhale hue. Bagal mein Nandita chain ki neend so rahi thi, uska sir thoda jhuka hua, saansein dheemi aur niyamit. Uska chehra ab thoda gulabi ho gaya tha, jaise gehri neend mein koi sapna dekh rahi ho.

Rudra baar-baar apne bete ko dekh raha tha. Wo itna chhota sa tha ki Rudra ke dono bade-bade haathon mein aaram se fit ho jaata. Bachche ki twacha halki sunhari aabha wali, gaal itne gulabi aur chikne ki lagta tha chhoote hi pighal jayenge. Wo so raha tha, lekin beech-beech mein uske chhote-chhote gulabi honthon se bulbule ban rahe the. Wo bulbule uske gaalon par gir rahe the, phir foot jaate the. Rudra ki neeli aankhon mein pehli baar wo naram bhaav tha. Usne dheere se bachche ki chhaati par haath rakha, dil ki dhadkan mehsoos ki.