College ke gate ke bahar Samrat ki gaadi aakar rukti hai. Woh khud utar kar pehle apni side ka door band karta hai, phir dusri taraf jaakar Vaidehi ke liye door kholta hai. Vaidehi dheere se bahar aati hai.

Shaadi ke baad pehli baar uska pati use college chhodne aaya tha. Use yakeen hi nahi ho raha tha—wahi Samrat, jo pehle use theek se dekhta tak nahi tha, usse baat tak nahi karta tha… aaj khud use college chhodne aaya tha.

Yeh uske liye kaafi hairani wali baat thi. Woh baar-baar apni palkein jhapka kar khud ko yakeen dilane ki koshish kar rahi thi ki yeh sach hai, koi sapna nahi.

Udhar Samrat apni mehengi Rolex ki ghadi dekhte hue thande andaaz mein kehta hai,

“It’s too late… go to your class.”

Yeh kehkar woh aage badhne lagta hai.

Vaidehi jaldi se apna bag sambhalte hue uske peeche bhaagti hai aur uske saamne aakar khadi ho jaati hai.

“Suniye… suniye na… suniye na…”

Teen baar awaaz lagane ke baad woh halka sa jhukkar apne ghutnon par haath rakh leti hai aur saansein sambhalte hue use dekhne lagti hai.

Samrat kaafi lamba tha aur uski chaal bhi tez thi. Uske do kadam, Vaidehi ke liye lagbhag chaar kadam ke barabar the.

Use is tarah haanfte hue dekhkar Samrat halka sa bhonh uthata hai aur thande lehje mein poochta hai,

“What happened?”

Uski awaaz mein koi khaas ehsaas nahi tha.

Vaidehi apni saansein sambhalte hue kehti hai,

“Woh… main bas thoda hairaan hoon. Shaadi ke baad pehli baar aap mujhe khud college chhodne aaye ho… isliye thoda shock lag gaya.”

Phir thoda jhijhak kar aage kehti hai,

“Aur… kal raat aapne jo kaha…”

Woh halka sa sharma jaati hai,

“Mujhe maaf kar dijiye, maine aapko mana kar diya tha. Main achanak sab kuch hone se thodi ghabra gayi thi. Aap achanak itne kareeb aane lage… mujh par haq jatane lage… yeh sab mere liye naya tha.”

Woh halki si muskaan ke saath aage kehti hai,

“Lekin… agli baar main aapko mana nahi karungi.”

Vaidehi ki baat sunkar Samrat apni ungliyon se maatha ragadte hue mann hi mann sochta hai,

“Back to her real self… stupid girl.”Uske chehre par wahi thandi aur beparwah expression wapas aa jata hai.

Samrat ke chehre par aisa thanda aur berukha expression dekhkar Vaidehi thodi udaas ho jaati hai. Woh dheere se kehti hai,

“Shayad aap ye sab isliye kar rahe ho kyunki main aapki biwi hoke kisi doosre aadmi ke paas ja rahi thi… isse aapki izzat par asar pad sakta hai. Main samajh sakti hoon… waise bhi aap mujhse pyaar nahi karte. Aap mere saath rehna bhi nahi chahte… koi baat nahi.”

Woh bina ruke bolti hi jaati hai,

“Main manage kar lungi… main aap par koi dabaav nahi daalungi. Meri wajah se aapko koi pareshani nahi hogi. Aur agli baar se main kisi bhi aadmi ke paas nahi jaungi…”

Woh non-stop bolti hi ja rahi thi.

Uski lagataar baatein sunkar Samrat achanak uske honton par apna haath rakh deta hai aur thande, jhunjhlae lehje mein kehta hai,

“Shut up… jab bolna shuru karti ho, rukti hi nahi ho.”

Woh ghadi ki taraf dekhte hue aage kehta hai,

“I’m getting late… tumhari wajah se mera kaam affect hoga.”

Uski baat sunkar Vaidehi thodi ghabra kar kehti hai,

“Lekin… mujhe aapse kuch baat karni hai…”

Lekin Samrat use poori tarah ignore karke wahan se chala jaata hai.

Use jaate hue dekhkar Vaidehi ke mann mein yahi aata hai ki shayad Samrat use bilkul pasand nahi karta… woh use ek minute bhi bardaasht nahi kar sakta.

Woh mann hi mann sochti hai,

“Sach mein… kitna bechara insaan hai. Uske apne parivaar ne hi dosti ke naam par uski zindagi ka faisla kar diya… uski feelings ki koi keemat hi nahi rakhi.”

Vaidehi ko Samrat ke liye bura lagne lagta hai.

“Shayad woh kisi aur se pyaar karta hai…”

Halaanki woh khud bhi kisi se pyaar nahi karti thi, lekin woh Samrat ki feelings samajh sakti thi.

Yahi sab sochte hue woh apni classroom ki taraf badhne lagti hai, tabhi peeche se ek ladki daudte hue aati hai aur use gale laga kar kehti hai,

“Vaidehi! tum bahut late ho chuki ho… humne first class miss kar di!”

Yeh sunkar Vaidehi chauk jaati hai,

“Gayatri… tu is time yahan?”

Gayatri apne uljhe hue, Maggie jaise baal theek karte hue kehti hai,

“Teri wajah se late hui hoon! tera hi intezaar kar rahi thi… tere bina main akeli kya karti?”

Gayatri ki baat sunkar Vaidehi halka sa muskurati hai aur kehti hai,

“Kuch nahi… woh mere husband mujhe chhodne aaye the… woh bhi pehli baar.”

Yeh sunkar Gayatri hairaan reh jaati hai,

“Sach mein? Lekin kaise? Tu mujhe sab kuch detail mein bata!”

Yeh sunkar Vaidehi halka sa sharma kar kehti hai,

“Chal… canteen chalte hain, wahan aaram se baat karte hain.”

Phir dono saheliyan canteen pahunch jaati hain. Vaidehi kaafi saara khaana order kar deti hai aur dono jaakar ek seat par baith jaati hain.

Itna sab dekhkar Gayatri hairaan hokar kehti hai,

“Tere paas itne paise kab se aa gaye? Tune itna sab order kar liya! Tujhe pata hai na, mere papa ne mera saara credit card cheen liya hai… maine unka favourite statue tod diya tha. Main to payment nahi kar sakti… aur tere paas to waise bhi paise nahi hote!”Yeh sunkar Vaidehi thoda attitude dikhate hue apne baal theek karti hai aur kehti hai,

“Ab mere paas do-do log hain—saasu maa aur sasur ji… dono ne card diya hai. Woh bhi black wala!”

Woh halka sa muh bana kar aage kehti hai,

“Pata nahi unhe kaise pata chal gaya ki mere husband mujhe paise nahi dete. Us din to unhone unhe achhi-khaasi daant bhi laga di… aur phir husband ji ne saara gussa mujh par nikaal diya. Lekin khair… paise to mil gaye, aur kya chahiye!”

Yeh kehte hue Vaidehi apna black royal card use dikhati hai.

Gayatri use dekhkar khushi se lagbhag pagal ho jaati hai,

“Arey! Yeh to mere papa ne bhi mujhe nahi diya! Sach mein tu kitni lucky hai… kitne achhe saas-sasur mile hain tujhe!”

Yeh sunkar Vaidehi ek gehri saans chhodti hai,

“Pagal hai kya? Sasur ji to theek-thaak hain… lekin meri saasu maa to poori Hitler hain! Mere sasur bhi unke saamne darr kar rehte hain.”

Woh halka sa sir hila kar kehti hai,

“Sach bolun, samajh nahi aata main in teen mahino se us ghar mein kaise reh rahi hoon. Lekin… dil ke bure nahi hain. Mere bhale ke liye hi bolte hain, pabandiyan lagate hain… aur chhupkar pyaar bhi karte hain.”

Phir uski awaaz thodi dheemi ho jaati hai,

“Bas… agar pati ka pyaar mil jaata na… lekin ab to lagta nahi milega. Shayad woh kisi aur se pyaar karta hai… mujhe nahi pata kis se.”

Yeh sunkar Gayatri thoda aur kareeb aakar hairani se poochti hai,

“Matlab itne mahino mein… tum dono ke beech kuch bhi nahi hua? Jo pati-patni ke beech hota hai?”

Yeh sunte hi Vaidehi jo juice pee rahi thi, halka sa khaans jaati hai.

Use kal raat ki saari baatein yaad aa jaati hain—Samrat ka achanak kareeb aana… uski demand… sab kuch.

Use aise react karte dekhkar Gayatri shararti muskaan ke saath kehti hai,

“Oho… samajh gayi! Kuch to gadbad hai. Chal bata… main teri secret diary hoon.”

Yeh sunkar Vaidehi halka sa sharma kar kehti hai,

“Kal… jab main canteen mein Ayush se baat kar rahi thi na… woh sab mere husband ne dekh liya. Aur uske baad unhone jo scene create kiya…”

Yeh kehte hue woh apne honton par haath rakh leti hai.

Gayatri muskuraate hue turant bolti hai,

“Toh unhone tujhe kiss kiya… aur phir raat mein tum dono ne romance kiya, hai na?”

Vaidehi turant bol padti hai,

“Haan… kiss to hua tha—”

Phir achanak ruk jaati hai aur peeche hat-te hue kehti hai,

“N-nahi! Aisa kuch nahi hua jaisa tu soch rahi hai. Kiss to hua tha… lekin aage kuch nahi hua… aur shayad hoga bhi nahi.”

Yeh sunkar Gayatri hairaan hokar kehti hai,

“Kyun nahi hoga? Tera pati hai… kabhi na kabhi to woh demand karega hi. It’s normal, yaar.”

Vaidehi gehri saans chhodte hue kehti hai,

“Nahi… woh shayad kisi aur se pyaar karte hain. Bas apni izzat ki wajah se batate nahi. Shayad woh ladki bahut gareeb hogi… utni sundar bhi nahi hogi. Aur unhe apne status ke hisaab se shaadi karni thi… isliye unhone mujhse shaadi kar li.”

Yeh sunkar Gayatri thoda udaas hokar kehti hai,

“Phir to ek love story adhoori reh jaayegi…”

Achanak Vaidehi ke chehre par alag sa expression aata hai,

“Par… hum ek kaam kar sakte hain!”

Gayatri hairani se use dekhne lagti hai.Vaidehi utsaahit hokar kehti hai,

“Woh bata nahi rahe to kya hua… hum unki madad karenge! Isse ek punya bhi milega. Waise bhi humne pehle hi bahut paap kar rakhe hain. Kitne kaand kiye hain humne…”

Woh thoda sharminda hokar kehti hai,

“Abhi do din pehle hi hamari wajah se us uncle ka pair toot gaya tha… pata nahi kitne logon ka kitna nuksaan kar chuke hain hum. Jaanbujhkar nahi kiya, lekin kiya to hai na…”

Phir halki si muskaan ke saath kehti hai,

“Ab thoda achha kaam karne ka time aa gaya hai. Main ek patni hokar apne pati ko unke pyaar se milwaungi… kitna achha kaam hoga na!”

Yeh sunkar Gayatri gusse mein kehti hai,

“Mujhe teri baat sunkar gussa aa raha hai! Tu kitni bewakoof hai… tujhe aisa karne ki koi zarurat nahi hai.”

Vaidehi use gale laga kar pyaar se kehti hai,

“Zarurat hai… tu samajh nahi rahi. Main unhe aise takleef mein nahi dekh sakti. Mujhe woh thoda-thoda pasand hain… poora nahi, par thoda to hai.”

Woh dheere se aage kehti hai,

“Aur maine faisla kar liya hai… ab main kisi bhi ladke se baat nahi karungi, chahe koi bhi ho. Isse unki izzat par koi aanch nahi aayegi… aur un par yeh dabaav bhi nahi rahega ki unhe mere kareeb aana pade.”

Dono abhi baat kar hi rahe the ki tabhi ek aadmi aakar kehta hai,

“Madam, sir aapko bula rahe hain.”

Yeh sunkar Vaidehi hairaan ho jaati hai. Woh time dekhti hai—3 baj rahe the.

Subah se dono bas baatein hi kar rahi thi aur na jaane kitna kuch kha bhi liya tha. Ab dono ko ulti jaisa feel ho raha tha. Zyada khane ki wajah se pet bhi thoda phool gaya tha… aur yahi haalat Gayatri ki bhi thi.

Unhe dekhkar Samrat ka personal assistant kehta hai,

“Madam, aapki tabiyat theek nahi lag rahi… kya main doctor bulaun?”

Vaidehi turant kehti hai,

“Nahi-nahi, assistant uncle… main bilkul theek hoon.”

‘Uncle’ shabd sunkar uska chehra thoda utar jaata hai. Woh bas 26 saal ka tha… aur ek 22 saal ki ladki use uncle bol rahi thi—dil ko thoda chubh hi gaya.

Udhar Gayatri bhi Vyom Shukla ki taraf dekhkar muskurate hue kehti hai,

“Koi baat nahi uncle, hum bilkul theek hain.”

Yeh kehkar dono saheliyan ek-doosre ko dekhkar hans padti hain aur wahan se bhaag jaati hain.

Vyom ke liye apni lady boss se ‘uncle’ sunna to theek tha… lekin Gayatri ke muh se sunkar uske dil mein ajeeb sa dard utha.

Lekin tabhi…

Dono achanak ruk jaati hain.

Saamne Samrat khada tha—apni thandi, tez nazron se unhe ghoorte hue.

Use dekhkar dono ke chehre ka rang udd jaata hai.

Gayatri dheere-dheere side se khisakne lagti hai. Aakhir woh uska professor bhi tha… aur uska gussa to sab jaante the.

Use darr lag raha tha ki kahin gusse mein woh use koi sakht punishment na de de…

Wahin Samrat ki nazrein ab seedha Vaidehi par tik chuki thi… jaise woh kuch kehne wala ho.

Isliye Gayatri wahan se jaldi se nikal jaati hai.

Idhar Samrat shaant awaaz mein kehta hai,

“Come to the car.”

Vaidehi sir hilaati hai aur apne pet par haath rakhkar dheere-dheere uske peeche chalti hai.Gaadi mein baithte hue Samrat use dekhta hai aur poochta hai,

“You okay?”

Vaidehi halka sa muskura kar kehti hai,

“Ji… main bilkul theek hoon.”

Samrat bina kuch kahe gaadi start karta hai aur tez speed mein drive karne lagta hai.

Kuch der baad dono ghar pahunch jaate hain.

Ghar pahunchte hi Vaidehi ki nazar saamne khade apne mummy-papa par padti hai. Unhe dekhte hi woh khushi se chillati hui bhaagkar apne papa ke gale lag jaati hai.

Yeh sab aas-paas khade log bhi dekh rahe the, kyunki ghar mein aur bhi guests aaye hue the.

Udhar Rukmini Devi bhi yeh sab dekh rahi thi… aur unhe yeh bilkul achha nahi lagta. Unhe yeh sab thoda insulting lagta hai.

Woh sakht awaaz mein kehti hain,

“Vaidehi!”

Unki awaaz sunte hi Vaidehi thoda ghabra jaati hai aur turant peeche hat jaati hai. Mahaul achanak awkward ho jaata hai.

Samrat bhi yeh sab dekh raha tha… use bhi situation thodi ajeeb lagti hai.

Tabhi Raghav Pratap Singh baat sambhalte hue kehte hain,

“Arey rehne dijiye… bachchi hai. Kam umr mein shaadi ho gayi hai, mummy-papa ko dekhkar emotional ho gayi hogi.”

Unki baat se mahaul thoda normal ho jaata hai.

Vaidehi apne mummy-papa se kuch kehne hi wali thi ki tabhi Rukmini Devi phir se bol padti hain,

“Vaidehi, pehle jaakar fresh ho jao… abhi-abhi college se aayi ho.”

Unki baat sunkar Vaidehi samajh jaati hai ki uska yahan aise khada rehna unki saasu maa ko bilkul pasand nahi aaya.

Woh bina kuch bole chupchaap apne kamre ki taraf chali jaati hai.

---

Doosri taraf, Samrat pehle se hi kamre mein maujood tha.

Vaidehi ko itni jaldi-jaldi aate dekhkar woh uske paas aata hai, use rokta hai aur kehta hai,

“What was that downstairs? You’re not a kid.”

Yeh sunkar Vaidehi turant apni kamar par haath rakhkar attitude mein kehti hai,

“Toh kya hua? Meri life hai, meri marzi! Aur woh mere mummy-papa the.”

Phir thoda chidhkar kehti hai,

“Aapko jalan ho rahi hai na? Kyunki aapko kabhi aapke papa ne godh mein nahi liya hoga… lekin mere papa mujhe bahut pyaar karte hain.”

Woh aage bolti jaati hai,

“Jalne ki zarurat nahi hai… jalkukde kahin ke! Professor ho toh kya?”

Uski bachkani baatein sunkar Samrat halka sa daant bheenchkar kehta hai,

“Stupid… duffer.”

Phir gusse mein poochta hai,

“Aur college mein kya zarurat thi us Gayatri se itna chipakne ki?”

Vaidehi hairaan hokar kehti hai,

“Lekin aapko toh problem ladkon se thi… woh toh ladki hai!”

Samrat uska haath pakadkar use apni taraf kheenchta hai aur thandi lekin sakht awaaz mein kehta hai,

“I don’t care… ladki ho ya ladka. You’ll stay away from everyone… because you are my wife.”

Woh uski kamar pakadkar aage kehta hai,

“You are mine… understood?”

Lekin tabhi—

Vaidehi, jisne pehle hi bahut zyada kha liya tha, achanak is dabaav ko seh nahi paati… aur seedha Samrat ke upar hi ulti kar deti hai.

---

Ab aage kya hoga?

Jab Samrat ko pata chalega ki uski biwi uske liye kya plan kar rahi hai… tab uska reaction kaisa hoga?

Kya kabhi Samrat aur Vaidehi ka rishta normal ho payega?

Aur kya Vaidehi is ghutan bhari zindagi mein khud ko adjust kar payegi?

Jaane ke liye padhte rahiye…

Umeed hai mere pyaare pathakon ko meri baaki kahaniyon ki tarah yeh kahani bhi pasand aayegi.

Isme dark romance ke saath-saath kaafi comedy bhi hai, jo aapko zaroor entertain karegi.

Toh jaldi se comment karo aur apni rating dena mat bhoolna ❤️